Pro 28 | MEU | STEP | Kara dika taudia be ta ese se havadiamu negadia ai e heau kavamu, a kara maoromaoro taudia na e haheaukamu, leona na heto.

Proverbs 28

1 Kara dika taudia be ta ese se havadiamu negadia ai e heau kavamu,
a kara maoromaoro taudia na e haheaukamu, leona na heto.
2 Basileia ta ai e kara havaramu negadia ai,
ena pavapava na hoho;
a aonega bona lalo-parara taudia daidiai,
ia na nega daudau baine gini tutuka-tutuka.
3 Ogoḡami tauna ese ogoḡami tauna e hahisiamu na
medu baroko ese aniani ḡaudia e hadikadia oremu na heto.
4 Taravatu e rakataniamu taudia ese kara dika taudia na e imodaidiamu,
a taravatu e badinaiamu taudia ese e biridia ahumu.
5 Kara dika taudia na hahemaoro ḡoevaḡoeva asi dibadia,
a Iehova e tahuamu taudia na dibadia vaitani.
6 Ogoḡami tauna ena lalo-momokani ai e rakamu be namo;
taḡa tauna mai ena kara gageva-gageva na dika.
7 Taravatu e badinaiamu merona na aonega merona;
a ani-lavadae taudia e bamodiamu merona ese tamana e hahemaraiamu.
8 Ena taḡa na heato-kau kohudia amo e habadaiamu tauna ese egogomu,
ogoḡami taudia e bogadia hisimu tauna ena.
9 Taravatu ikamonaina amo taiana e daro kepokepomu tauna
ena ḡuriḡuri na ḡau dika-rohorohona.
10 Kara maoromaoro taudia kara dika dalana ai e hakaudia kereremu tauna na
sibona ena guri ai baine moru dobi;
a asi edia kerere taudia ese
ahudia namodia bae abi.
11 Taḡa tauna na mai aonegana, sibona ena ita-ita ai;
a ogoḡami tauna mai lalo-pararana ese ena koikoi baine davaria.
12 Kara maoromaoro e kwalimumu negana ai heimodai na bada;
a kara dika taudia e tore isimu negana ai taunimanima bae komu.
13 Ena kara dika e hunidiamu tauna basine namo,
a ena kara dika e gwaurai hedinaraimu bona e rakatanimu tauna na ena dika baine hegwau tao.
14 Nega idoinai Iehova garina e garimu tauna na namo,
a lalona e ha-aukaiamu tauna na hahehisi lalonai baine moru.
15 Pavapava dikana ese ogoḡami taudia e biagudia na
leona e ḡoumu eiava bea e daḡedaḡemu na heto.
16 Pavapava asi lalo-pararana ese taunimanima e hahisidia badamu;
a taḡa iabi-koikoina e inai heniamu tauna ese ena mauri dinadia baine hahohodia.
17 Taunimanima rarana e hahebubua tauna na
heau tauna ai bainela ela bona mase;
tau ta ese basine durua.
18 Kara maoromaoro ai e rakamu tauna na baine roho mauri,
a kara gageva-gageva tauna na guri ai baine moru dobi.
19 Ena tano e ruaiamu tauna ese aniani momo baine abi,
a kara asi anidia e karamu tauna na baine ogoḡami herea.
20 Heabidadama tauna ese ḡau namodia momo baine abi,
a taḡa e ḡavalaiamu tauna ese mata-hakani basine reaia.
21 Kaha ta ai mo e taomu karana na dia namo;
a aniani taina helaoreana ai tau ta baine kerere.
22 Taga e ura heniamu tauna eseltaḡa e ḡava heniamu;
asi dibana ia na do baine ogoḡami.
23 Tau ta e sisiba heniamu tauna ese gabeai lalo-namo bada baine abia;
a malana amo e hanamoa koikoimu tauna ese lalo-namo maragi baine abia.
24 Tamana eiava sinana ena ḡau e henaomu
bena e tomu “Una na dia kerere” tauna na
hahebua-tari tauna bamona.
25 Mata ḡaniḡani tauna ese heiri-heiri e havaraiamu;
a Iehova e abidadama heniamu tauna ena taḡa do baine bada.
26 Sibona lalona e abidadama heniamu tauna na kavakava tauna;
a aonega ai e rakamu tauna na do baine roho mauri.
27 Ogoḡami taudia e harihari henidiamu tauna na basine dabu,
a matana e hakapuamu tauna na bae uduguiraia bada.
28 Kara dika taudia e tore isimu negadia ai, taunimanima na e komumu;
a e masemu negadia ai, kara maoromaoro taudia na e hutumamu.